الجحش قال للحمار *** يابا اديني الحنطور
يابا انت سنك كبر*** و وجب عليا الدور
كح الحمار كحة *** فزعت لها الركاب
مش يابني بالصحة *** ده كل شئ بحساب
وسواقة الحنطور *** محتاجة حد حكيم..
.وانت عينيك فارغة *** همك علي البرسيم
قوللي تسوق ازاي *** والتبن مالي عينيك
ده حتي حبل اللجام *** واسع يا ابني عليك
اعقل وبطل طمع *** لاتسخن الركاب
ما تجيش يا واد جنبهم *** لاتبقي ليلة هباب
دول صنف ناس جبار *** قادر مالوهش امان
يبان عليهم وهن *** لكنهم فرسان
يابا دا نومهم تقل *** وبقاله يابا سنين
كل البشر صحصحوا *** ولسه دول نايمين
يا جحش بطل هبل *** وبلاش تعيش مغرور
ركابنا مش اغبيا *** ولا عضمهم مكسور
بكرة حيصحولك *** ويزلزلوا الحنطور
وتلاقي في قفاك *** تمانين خازوق محشور
@@@@@@@@@@@@@@@@@@@@
العربجي وابنه** ماشين في وسط الدور
بص الراجل حواليه** لقى فلل وقصور
قال دول لمين يابني** واحنا في اراضي بور
قال يابا دول للحمار**ولابنه من بعده
ماهو كلو بالدستور** واحنا خدم عنده
......رد الراجل بذهول** بقي ارضنا ليهم
ارضي وارض اجدادي** يتمرمغو فيهم
رد عليه ابنه**بصوت حزين مكسوف
ماهي ارضهم يابا**واحنا عليها ضيوف
ومال علي ودنو**ووشوشو بخوف
يابا الحيطان تسمع** وادينا اهو عايشين
خلينا ناكل عيش ** اوحتي ناكل طين
بس المهم نعيش **ومسيرها تتعدل
ومايقفشكش شاويش** وساعتها تتبهدل
وكمان ممكن تموت **ويقولو مات مخنوق
ويقولو كان حشاش** ويقولو الف خازوق
من خاف سلم يابا**خلينا جنب الحيط
لو حد يوم اتكلم ** يقولو عنو عبيط
والاغلبية تقول** الناس ولاد التيـــت
هايصدعو دماغنا ** بالظيطه والتنطيت
غللولهم اللحمه** والرز والبنزين
هايتلهو عنا ** وادينا اهو قاعدين
والناس ماهش ناقصه** عشان كده ساكتين
بنخاف لنتكلم** ليسففونا الطين
رد الراجل زعلان** بتخافو ياشطار
عجبي علي القطه** لما تخاف م الفار
عجبي علي تمانين** عايشين في ضل حمار
احمد فؤاد نجم
